Kimsa niki Shunkumanta Rimashun punchapika Paola Velasquez mashiwanmi rimarishpa kanakurkanchik, imashinata manga nishka tullpukunata kichwa kawsaykunawan, runallaktakunawan wankushpa, tinkishpa shuk sumak tullpukunata wiñachin, shinallata willachin kay tullpuy ñanpika 10 watakunata purishpa kayta.
Chillay 4 Pawkar killapimi kay sumak rimariytaka charishpa karkanchik, kay rimariypi riksichirka imashinata kay tullpuykunawan kallarishpa kashkata, chaypimi nin runallaktakunapa kawsaykunata taripayta rurashpami kallarishka, chaypi katishpami wiñachin rikchakunata, shuyukunata, killkaykunata mishushimiwan kichwashimiwan chapushpa rimariypi kawsayta kun.
Willachishpa katin, killkaykunata, shuyukunata wiñachishka hipaka tullpuykunawan tukuchin, chaypi sombra nishkakunata yapachishpa pankakunapi llukchin; kay killkaykunaka mana asinkapalla kan ashtawankarin runa kawsaykunata, kichwa shimitapash sinchiyachin nishpa tukuchirka.